長毛也被包圍　版權條例暗戰

鍵盤戰線等十多個民間團體昨日在旺角行人專用區搞記者會，呼籲市民反對人稱「網絡23條」的版權修訂條例草案，社民連立法會議員長毛梁國雄與出席者起爭拗，長毛被圍一個多小時，最後在警員護送下離場。

參加記者會的團體包括鍵盤戰線、多個傘後組織、熱血公民等。他們認為政府的草案仍有灰色地帶，表明星期三會包圍立法會，要求議員拉布。其實記者會前有多名戴口罩市民現身，以粗口指罵長毛，問佢會唔會幫忙拉布，他就反駁話：「 你會唔會食飯。」

到人稱四眼哥哥的學生前線成員鄭錦滿發言時，要求議員拉布， 話即使泛民全投反對票，都無法阻止議案通過，目前只有黃毓民提出了逾900項修正拉布，「 自命激進民主派的議會內政黨如人民力量、社民連都要立即表態，加入拉布，拉倒惡法。」

長毛聞言就衝前搶去鄭錦滿手中無線咪，話「 毓民成日拉布都唔喺度，講嘢」。結果就變成粗口罵戰，搞到記者會都要草草收場，不滿者繼續包圍長毛，質問他是否加入拉布，後來長毛回應話「毓民昨日嚟搵我，話驚佢頂唔住，叫我幫手拉布，我已經應承咗啦」，仍不獲放行，被人包圍近一小時，場面一度混亂，有圍觀的市民被推倒在地。最後長毛在警員護送下，走了多個街口，才登上的士離去。

版權條例面對的政治形勢複雜，四眼哥哥話「 即使泛民全投反對票都阻唔到議案通過」， 一語道出泛民內部的矛盾，就如民主黨立法會議員單仲偕， 也一早表態支持修改法例，佢話收到好多反對草案的意見， 但草案已作出六項豁免，包括網民最關注的問題。

單仲楷話有關草案討論了近10年，外國政府好關注香港侵權，若草案被否決，香港有可能遭美國貿易代表處列入《 特別301法案》監察名單，令本港聲譽和經濟利益受損。

美國在背後力挺法案通過，以保障美國公司的版權利益，美國駐港總領事夏千福曾約見反對版權修訂條例的立法會議員，話美國好關注香港有無決心保障版權。所以版權法修訂，係一場暗戰，政府似乎在美國壓力下修例，唔少和美國關係友好的泛民，只係打「因住波」去反對。

Ariel

** 博客文章文責自負,不代表本公司立場 **

重建後嘅皇崗口岸喺2026年10月12日正式開通，實施「一地兩檢」同「合作查驗、一次放行」，仲要24小時通關，真係好方便。開通接近一個月，平日日均出入境人次已經超過86,000，比以往落馬洲管制站多咗成倍；去到週末同假期，日均更加直逼140,000人次，受歡迎程度可見一斑。

不過，人潮多咗，交通需求大增，政府就留意到有市民同旅客貪方便，搭咗啲跨境私家車往返兩地，而且當中部分係非法出租或取酬載客嘅「白牌車」。呢啲車無合法嘅出租汽車許可證，做生意屬刑事罪行。為咗保障乘客同道路使用者安全，政府近期已經明確表示高度關注，執法部門亦加強咗打擊，除咗依法檢控違例司機，仲會扣押涉事車輛。運輸署同警方亦都密密做宣傳，除咗於官方網站及社交媒體發放訊息，運輸署亦向封閉道路通行許可證持有人以及指定跨境駕駛計劃批准信持有人發出電郵，直接提醒相關車主唔好以身試法，列明違法嘅嚴重後果，同時呼籲市民要認清風險。

警方近日在新皇崗口岸拘捕一名42歲持雙程證的內地男司機，涉案豪華七人車亦被拖走扣留檢驗。

可能有人會諗：「有人肯車我，價錢啱咪得囉，做乜要搞咁多嘢？」但高人提醒，從市民自己嘅角度出發，坐「白牌車」其實係一場「搵命搏」嘅賭博，主要有兩大風險：

第一，保險隨時有機會失效，意外隨時面對索償無門。

合法嘅跨境出租車必須持有常規配額、封閉道路通行許可證同出租汽車許可證。但「白牌車」冇呢啲牌，一旦發生交通意外，提供非法服務嘅車輛，佢嘅第三者責任保險係有可能會失效。即係話，如果坐白牌車出事受傷，甚至造成傷亡，你有機會追究無門，無法獲得應有嘅賠償。為咗貪一時方便，將自己同家人嘅安全較飛，值唔值得咩？

第二，罰則極重，唔好以為只係抄牌咁簡單。

根據《道路交通條例》第374章第52(3)條，無牌載客屬刑事罪行。警方會用「放蛇」方式去蒐證，亦會喺口岸一帶同黑點加強巡邏。一旦斷正，首次定罪最高罰款港幣10,000元、監禁6個月，車牌吊銷6個月；如果再犯，最高罰款25,000元、監禁12個月，車牌吊銷12個月。涉案車輛喺吊銷牌照期間要交畀運輸署保管，司機更會被停牌最少12個月至3年。運輸署仲會撤銷埋涉事車輛嘅封閉道路通行許可證。如果涉及內地司機，警方仲會查埋係咪非法勞工或者違反逗留條件，轉交內地執法部門跟進。

其實皇崗口岸嘅交通配套正逐步完善，港九新界都有合法交通工具直達，包括7條專營巴士（6條日間、1條通宵）、3條日間同3條通宵專線小巴、5條短途跨境巴士同長途跨境巴士，仲有市區的士、新界的士同車隧的士。

高人話，政府打擊「白牌車」，並唔係要阻礙大家出行，而係要守住安全底線，同時可令皇崗口岸更暢順。對市民來講，搭合法交通工具先可以保障自己同屋企人。